2025 жылғы 17 желтоқсанда сағат 15:00-де Қазақстан Республикасының Ұлттық орталық музейінде суретші Татьяна Шапироның «ЖАСУШАЛЫҚ ҚҰРЫЛЫМ» атты жеке көрмесінің салтанатты ашылуы өтеді.
Бұл — адамның ішкі әлемін тануға арналған, өнер мен философиядағы жаңа дүниетанымды ашатын көркем жоба.
«Жасушалық құрылым» көрмесі жасуша бейнесін бүкіл тіршіліктің алғашқы негізі ретінде зерттейді. Экспозиция көрерменді санамыздың «жасушаларын» немен толтырып жүргеніміз туралы ойлануға шақырады: естеліктермен, қорқыныштармен, үміттермен, түстермен, ғылым-біліммен, поэзиямен және күнделікті тіршілік қамымен. Бір жағынан, барша адамзат біртұтас тірі ағза ретінде қаралатын ғаламшардың бір бөлшегі болып, жасушалық құрылымы жағынан бір-біріне ұқсайды. Екінші жағынан, әркім өзінің «өмір жасушасын» өзі таңдайды: біреулер шектеулер мен үрейдің тар шеңберінде өмір сүрсе, енді біреулер санасын Ғалам кеңістігіне дейін кеңейтеді. Көрме адам еркіндігі, таңдау құқығы және ішкі әлемі туралы терең ойлануға шақыратын кеңістік ретінде көрерменге ұсынылады.
Оның шығармашылығына өнер тарихын зерттеу, музейлерге бару, биенналелер мен халықаралық көрмелерді тамашалау үлкен әсер етті. Автордың шығармашылық жолындағы ерекше маңызды кезеңдердің бірі — белгілі қазақстандық суретші, «Белсенді ұзақ өмір сүру» орталығының ұстазы Марлан Кенесұлы Нысанбаевпен танысуы болды. Бұл орталық қалалық, облыстық, республикалық және халықаралық көрмелерге белсенді қатысып келеді, ал Татьяна Шапиро да осы көрмелерде бірнеше рет өнер көрсеткен. Бүгінде Татьяна Шапиро — қазақстандағы қылқалам өнерінің айқын өкілі, ал шығармалары өз өмір жолы мен терең ішкі ізденісін бейнелейді.
Осы жолды жалғастыра отырып, 2014 жылы оның «Уақыттың көп нүктесі» атты жеке көрмесі кең резонанс тудырды. Ақын Заир Әсім оны «естеліктің терезелері — ішкі өмірбаянның іздері» деп атады. Сонымен қатар, оқшаулану, үмітсіздік және үміт тақырыптарына арналған төрт графикалық жұмыстан тұратын серия Ұлыбританиядағы жеке коллекцияға енді. Ал ирониялық «Галстук режимін құлату» атты жұмысы (еркектер галстуктарынан жасалған кілем) оның көп қырлы көркемдік тілінің айқын мысалы болды. Суретші сонымен бірге «Умай», «Tango Square», «Улар» және басқа да галереяларда топтық көрмелерге белсенді қатысуда.
Сонымен қатар, Татьяна Шапироның шығармашылық өмірбаянының маңызды кезеңдерінің бірі халықаралық көрме қызметі болды: 2018 жылы «Естеліктің естелігі» атты жұмысы Париждегі Grand Palais-дегі Art Capital халықаралық көрмесінде таныстырылып, қазір Лондонда жеке коллекцияда сақтаулы.
Татьяна Шапиро кескіндеме, графика, коллаж, инсталляция, қолданбалы және сәндік өнер сияқты әртүрлі жанрлар мен бағыттарда жұмыс істейді. Бүгінгі таңда оның шығармашылық тәжірибесінде керамика ерекше орын алады. Көрмеде шамамен 70 жұмыс ұсынылады, олар суретшінің көркемдік ізденістерінің кең ауқымын және өнердегі даму жолын көрсетеді.
