Александр Селезнёв атындағы Алматы хореография училищесінде Албан Лендорф пен Себастьян Клоборгтың шеберлік сабақтары, сондай-ақ Мария Кочеткованың қатысуымен шығармашылық кездесу және баспасөз конференциясы өтті.
Практикалық сабақтарға училищенің жоғары курс студенттері қатысты. Бағдарлама Дания балет мектебінің дәстүрлерімен танысуды және авторлық заманауи хореографиямен жұмыс істеуді қамтыды.
Классикалық би: Бурнонвиль стилімен танысу
Классикалық би бойынша шеберлік сабағын Дания корольдік балеті мен American Ballet Theatre театрының бұрынғы премьері, халықаралық Benois de la Danse сыйлығының лауреаты Албан Лендорф өткізді.
Әртіс студенттерді дәстүрлері Дания балет мектебінің негізін құрайтын Август Бурнонвильдің стилімен таныстырды. Бұл стильге секірулердің жеңілдігі, аяқ қимылдарының шапшаңдығы мен ұсақ техникасы, қол қозғалыстарының жұмсақтығы және дененің табиғи сымбаты тән. Орындаудың сыртқы еркіндігі күрделі үйлесіммен және техникалық дәлдікпен ұштасады.
Баспасөз конференциясында Албан Лендорф студенттердің қызығушылығы мен жаңаны білуге деген ұмтылысын атап өтті. Әртістің айтуынша, сабаққа дайындалу кезінде ол қазір өзі студент болса, қандай білім мен тәжірибе пайдалы болар еді деген сұраққа сүйенген. Осы ұстаным сабақтың мазмұны мен реттілігін айқындады: материал қатысушылардың мүмкіндіктерін ескере отырып, біртіндеп ұсынылды және олардың өздеріне үйреншікті емес орындау мәнеріне қызығушылығын арттырды.
Албан Лендорф Копенгагендегі Дания корольдік балет мектебінде білім алған. 2011 жылы Дания корольдік балетінің премьері атанып, 2015 жылы American Ballet Theatre труппасына сол мәртебеде қосылды. Оның репертуарында «Аққу көлі», «Жизель», «Ұйқыдағы ару», «Ромео мен Джульетта», «Дон Кихот», «Баядерка», «Сильфида» және «Камелиялы ару» балеттеріндегі жетекші партиялар бар. Әртіс - 2013 жылғы «Үздік биші» номинациясы бойынша Benois de la Danse сыйлығының лауреаты, Premio Positano және Reumert сыйлықтарының иегері, Данеброг орденінің кавалері.
Заманауи хореография: Себастьян Клоборгтың авторлық тәсілі
Заманауи хореография сабағында Себастьян Клоборг өзінің хореографиялық материалын ұсынып, орындау техникасын өзі көрсетті. Студенттер автормен тікелей жұмыс істеу арқылы оның пластикалық тілімен танысуға мүмкіндік алды.
Клоборг өзінің шығармашылық тәсілінде қозғалысты эмоциялық ниетпен және сахналық мағынамен байланыстырып, орындаушының даралығына көңіл бөледі. Оның туындылары би, актёрлік мәнерлілік және өнердің өзге түрлерінің өзара ықпалдастығына негізделген.
Себастьян Клоборг - Дания корольдік балет мектебінің түлегі, Дания корольдік балет труппасының бұрынғы солисі. 2012–2014 жылдары Штутгарттағы Gauthier Dance труппасында жұмыс істеді. Оның қойылымдары қатарында Дания корольдік балетіне арналған Allerede Nat және Under Dybet, Ағылшын ұлттық балетіне арналған Flight Mode және Clan B, Beijing Dance Theatre үшін жасалған Retreat, Danish Dance Theatre үшін қойылған The Nightingale бар. Хореограф драмалық театр мен би киносында да жұмыс істейді. Ол - «Жыл бишісі» номинациясы бойынша Premio Positano сыйлығының, сондай-ақ Reumert сыйлығының иегері. Соның ішінде «Қараңғы көктем» спектаклін бірлесіп қойғаны үшін 2023 жылы «Жыл режиссёры» атанды.
Мамандық туралы әңгіме
Баспасөз конференциясы мен шығармашылық кездесуге Мәскеу мемлекеттік хореография академиясының түлегі, прима-балерина Мария Кочеткова да қатысты. 2002 жылғы Prix de Lausanne байқауының лауреаты Лондондағы Корольдік балет пен Ағылшын ұлттық балетінде жұмыс істеп, San Francisco Ballet және American Ballet Theatre театрларының примасы болды. Шақырылған әртіс ретінде Үлкен және Мариин театрларының, Ла Скала, Рим операсының және әлемнің басқа да жетекші театрларының сахналарында өнер көрсетті. Оның марапаттары қатарында «Жыл балеринасы» номинациясы бойынша Premio Positano, Жизель партиясын орындағаны үшін берілген Isadora Duncan Dance Award және «Бенуа - Мясин» жүлдесі бар.
Қонақтар балетке қалай келгенін, алғашқы шабыт көзі не болғанын және мамандық таңдауына не әсер еткенін әңгімеледі. Кездесуге қатысушылар әртісті қалыптастыратын қасиеттерді, күнделікті еңбектің маңызын және жаңаны игеруге дайын болуды талқылады. Албан Лендорф, Себастьян Клоборг және Мария Кочеткова журналистердің, студенттер мен педагогтердің сұрақтарына жауап берді.
Қонақтар училищемен, оның тарихымен және қазақстандық балет әртістерінің бірнеше буыны қалыптасқан дәстүрлерімен де танысты. 1934 жылы негізі қаланған училищеде қазір 93-ші оқу жылы өтуде. Оның түлектері қатарында Дәурен Әбіров, Заурбек Райбаев, Болат Аюханов және М intай Тілеубаев бар.
Түлектер бастамасы
Әлемдік сахна шеберлерінің сапары училищенің үш түлегі - Мейрамбек Назаргожаев, Олжас Атишев және Даурен Онербеков құрған Nomad Ballet Project жобасының арқасында жүзеге асты.
Мейрамбек Назаргожаев - Дания корольдік балетінің солисі. Әріптестерімен бірге ол қазақстандық студенттердің шетелдік әртістермен және хореографтармен кездесулерін ұйымдастырып, халықаралық шығармашылық және білім беру байланыстарын дамытуда. Болашақ әртістер үшін бұл - әртүрлі орындаушылық мектептермен танысып, әлемдік балет өкілдерімен жұмыс істеу тәжірибесін жинақтау мүмкіндігі.
Сапар бағдарламасы 3 қарашада Себастьян Клоборгтың заманауи хореография бойынша шеберлік сабағымен жалғасады.
Сол күні сағат 19:00-де Абай атындағы театр сахнасында Албан Лендорф пен Мария Кочеткова Пётр Чайковскийдің «Аққу көлі» балетінде өнер көрсетіп, ханзада Зигфрид пен Одетта - Одиллия партияларын орындайды. Спектакльді Nomad Ballet Project Абай атындағы театрмен бірлесіп, театрдың балет труппасы мен симфониялық оркестрінің қатысуымен ұсынады.
